ब्ल्युस्टार ओभरसिजमा अपराध महाशाखाको छापा, सयौँ थान राहदानी सहित लाखौं ठगीको प्रमाण भेटियो

काठमाडौं, २४ पुस
महानगरीय प्रहरी अपराध महाशाखाले वैदेशिक रोजगारीको नाममा ठगीमा संलग्न म्यानपावरमा छापा मारेको छ । सिनामंगल शक्तिमार्गस्थित एउटा घरमा लुकिछिपी सञ्चालन गरिएको ब्ल्युस्टार ओभरसिजमा छापा मारी सयौँ थान राहदानी, भिसा इन्ट्री रजिष्टर, स्वीकृत नगरिएका मागपत्र लगायतका कागजातहरु प्रहरीले नियन्त्रणमा लिएको हो । प्रहरीका अनुसार उक्त मेनपावरले सिन्धुपाल्चोकका ओसन गिरी लगायत २६ जनासँग कुवेत लगायतका देशमा पठाउने प्रलोभन देखाई १० लाख ६५ हजार रुपैयाँ लिएर मेनपावरले विदेश नै नपाएको पाइएको छ ।
पीडितहरुले बिहीबार महाशाखामा उजुरी गरेपछि प्रहरीले छापा मारेको हो । उक्त मेनपावरले ठग्दै कार्यालय सार्दै आएको समेत पाइएको छ । यसअघि वाग्मती खोलामा रहेको मेनपावर कानुनविपरीत रुपमा सिनामंगल सारेको पाइएको हो । मेनपावरले डिमान्ड नआए पनि आएको देखाई ३ सय ७१ जनाको राहदानी संकलन गरेको पाइएको छ ।
पीडितहरुसँग पैसा र राहदानी बटुलेर भर्पाइसमेत नदिई ठगी गरेको खुलेपछि प्रहरीले कागजात बरामद गरी अनुसन्धानका लागि वैदेशिक रोजगार विभाग बुद्धनगर पठाएको छ ।
वैदेशिक रोजगार ऐन २०६४ अनुसार दोषी प्रमाणित भए तीन लाखदेखि पाँच लाखसम्म जरिवाना र यसका हर्ताकर्तालाई तीनदेखि ७ वर्षसम्म कैद सजाय हुनेछ भने मेनपावरको इजाजत नै खारेज हुने व्यवस्था समेत कानुनमा रहेको छ ।